My lewe, ‘n laslappie kombers … Geskryf deur: ammie Gepubliseer op: 28th Oct 11

My lewe, ‘n laslappie kombers …

Geskryf deur: ammie

Gepubliseer op:  28th Oct 11

Afdeling(s):  Afrikaanse Gedigte |

  0 comments

‘n Laslappie-kombers, soveel verskillende kleure
‘n Roostuin wat blom, soveel verskillende geure
Dit is hoe ek my lewe wil sien
Ek wat ‘n God van liefde dien

Soms is die kleur van my lewe swart
Dan vra ek vergifnis diep uit my hart
Soms is die kleur van my lewe rooi
Blink oë en ‘n hart vol liefde getooi

Soms is die kleur van my lewe geel
Sulke dae wat ek my hart verseel
Soms is die kleur van my lewe blou
Geluk in my hande wat ek na jou toe hou

Soms is die kleur my lewe groen
Wonder wat ek op hierdie aarde doen
Soms is die kleur van my lewe grys
Dan ‘n vriendin wat haar liefde vir my wys

Maar vandag is die kleur van my lewe ‘n reenboog so mooi
Met vrede, liefde, geluk, en respek wat ek na jou kant toe gooi
Ek sê dankie vir my Vader in die Hemel dat ek ‘n reenboog kan wees
Want almal wat my ken, kan altyd die kleur van my lewe op my gesig lees

My lewens-reenboog het ‘n breë goue rant
Want ek weet Hy is elke dag aan my kant
n Kleurvolle lewe waarna ek smag
Liefde, vreugde en respek elke dag

Mag die rooi en blou ook jou lewe omvou
Jy mag foute maak solank jy dit berou
Mag die goue rant jou reenboog verhelder
Hartseer, Seer en verlange vir altyd kelder

Hulle sê onder die reenboog vind jy mos ‘n pot goud
Goud het ek reeds gevind, want my God is my behoud
Blou, pienk, oranje, pers en rooi
My lewe ‘n laslappie-kombers, kleure so mooi …